Tipografía creada por Otl Aicher en 1989 formando parte da macro familia Rotis, dividida en catro subfamilias: Rotis Sans, Rotis Semi Sans, Rotis Serif e Rotis Semi Serif. Aínda que existen moitas outras macro familias con versións con e sen serifa e incluso cunha versión intermedia, a Rotis foi a primeira que incluíu dous pasos intermedios (Semi Sans e Semi Serif), facendo que o cambio entre un e outro sexa máis suave. A Semi Serif está máis achegada á Serif que á Sans, e a súa característica máis notable radica na ausencia de remates na parte inferior da letra, mantendo só as superiores. Combina perfectamente coas outras familias da Rotis ao ter a mesma estrutura e proporcións, podendo crear desta maneira deseños tipográficos moi sofisticados, útiles para identidade corporativa, libros, carteis, publicidade, etc.