Etiquetas: FontFont

Creada polo deseñador alemán Martin Wenzel en 1999 para FontFont. Segundo Wenzel “quixen facer unha tipografía seria, por iso me trasladei dende Berlín a estudiar tipografía e deseño gráfico en Hague. E a Profile é o que quería”. O certo é que se trata dunha tipografía moi atractiva, onde se unen formas clásicas cun tratamento máis contemporáneo e actual. Os seus trazos teñen unha aparencia moi humana, cun mínimo contraste, conseguindo unha tipografía moi lexible a tamaños pequenos pero cunha gran personalidade en titulares. Posúe uns remates en ángulo e unhas proporcións clásicas moi singulares. As versións en cursiva son verdadeiras, non se trata dunha simple inclinación da redonda. O espaciado entre os caracteres está coidadosamente tratado: as versións máis pesadas (Bold, Black) teñen menos interletrado que as máis lixeiras. Wenzel inverteu moito tempo en optimizar e perfeccionar os anchos e a táboa de kerning. Os primeiros deseños fixéronse en 1995, a maioría debuxados directamente no computador, e durante os catro anos seguintes, a familia sufriu numerosos cambios e redeseños ata a versión definitiva que consta de cinco pesos distintos con numerosas variantes como capitulares, números especiais, caracteres matemáticos, símbolos, etcétera.


Creative Commons License
Esta obra está baixo unha licenza Recoñecemento 2.5 España de Creative Commons.
Páxina web creada por Oscar Otero (oom!)